جاتوه السويسرول

جاتوه السويسرول

المقادير



نفس المقادير السابقه بزياده شويه ميه صغيره

4بيضات
100جرام سكر عادى (نص كوب معيار)
100جرام دقيق (كوب معيار دقيق منخول و مش مهزوز ولا مكبوس)
4جرام بيكينج بودر(ملعقه صغيره)
ربع ملعقه صغيره ملح
فانيليا

الزياده هى 40مل ميه(اقل من ربع كوب المعياربمقدار ملعقه كبيره)
الصاج 35× 25 سم تقريبا



الطريقه
ها نستعمل طريقه فصل الصفار عن البياض ودى افضل الطرق لعمل السويسرول
وانا كنت وضحت نقطه الفرق بينها وبين طريقه البيض الكامل التفصيل فى موضوعى السابق


****نفصل الصفار عن البياض بهدوء بدون ما تيجى نقطه صفار على البياض
****نخفق الصفار مع 2\3كميه السكر اللى عندنا



****بعد ما لونه يفتح ويتقل نضيف الميه والفانيليا ثم الدقيق (ومعاه البيكينج بودر)






*****فى اثناء الوقت ده بنخفق بياض البيض مع شويه الملح

ونضيف السكر الباقى بالتدريج مع الخفق لحد قوام المنقار ده مش اكتر من كده والا السويسرول ها يبقى زى الاستيك مش ها يبقى حلو خالص



.

*****لومش هاينفع تعمليهم الاتنين فى وقت واحد تعملى البياض الاول وبعديه الصفار مش العكس

*****نخلط البياض بالتدريج مع خليط الصفار بالاسباتيولا بهدوء



*****نصبه فى الصاج ونساويه وندخله الفرن برضه اعلى من المتوسط 10----15دقيقه مش اكتر



****نسيبه دقيقه يهدى وننقله على شبكه بالورقه بتاعته ونسيبه يبرد خالص


وده شكله بعد ما خرج من الفرن




**** اطمنى مش ها تحتاجى تلفيه وهو سخن ولا حاجه ان شاء الله مش بيتكسر ولاحاجه
ماشاء الله زى الفل بس لو خايفه ها تلفيه وتسيبيه يبرد


*****هنا بقى عكس الجاتوه السابق بنحشيه فى نفس اليوم (طبعا بعد مايبرد خالص) ونلفه ويبات لتانى يوم
عشان يتجانس ويتماسك ويبقى بيدوب فى البق مش بيمضغ معانا

*****نفرد طبقه كريمه او اى حشو تانى شايفين الكريمه بتلمع ما شاء الله ومتماسكه ازاى



****كل ده والسويسرول على نفس الورقه ونلفه بهدوء ونلف الورقه عليه








انا لفيته بالعرض عشان تيقى القطع صغيره ممكن تلفيه بالطول

*****نسيبه فى التلاجه وبعدين نغلفه انا غلفته برضه كريمه ورشيت بشر شيكولاته




*****نقطعه ونحطه فى ورقه الجاتوه(بنتصرف برضه لو ما فيش)ونزين حسب ما نحب

****عايزه اقول انى عملت النوعين دول مع بعض وكنت مستعجله فا ما بيتش الكيك لتانى يوم ولا حطيته فى التلاجه وما شاء الله كان تحفه بس لانى كنت مستعجله قوى فى عمله الولاد كانوا عايزينه يومها على طول
لكن لازم عشان يكون مظبوط نتبع الطريقه الصح
ودى صور للجاتوه