طريقه عمل الكيكة الأسفنجية بالصور و بالتفصيل الممل لعمل كيكة كبيرة وتزينها كمان للمتدئات

 طريقه عمل الكيكة الأسفنجية بالصور و بالتفصيل الممل لعمل كيكة كبيرة وتزينها كمان للمتدئات

لو هتعملي صينية اصغر اقسمي المقادير للنصف



المقادير
10 بيضات (( تكون خارج الثلاجه ))
رشة فانيليا
1 ونصف مج سكر (( mug كوب كبير ))
2 كوب دقيق (( نستعمل نفس الكوب اللي عايرنا بيه السكر ))
منهم 2 ملعقه كبيرة نشا
و لو هنعمل كيكة شوكولاته نشيل ربع كوب دقيق و نحط بدالهم كاكاو
و نحط 1 ملعقه صغيره باكينج باودر
وننخل كل ده مع بعض اكثر من مره



الطريقه



1 -الأول نفتح الفرن علشان يسخن بس الحرارة تكون متوسطة
لازم مضرب كهربائي لأن من شروط نجاح الكيكة اننا نخفقها كثييير جداً
نحط ال 10 بيضات و رشة فانيليا و السكر و نخفق كويس لمده طويله
لحد ما يتغير لونها و ترتفع و تحسي انها جمدت شوية







2 - عند إظافة الدقيق ما نستعملش المضرب الكهربائي و نستعمل ملعقة خشب
أو مضرب بيض يدوي و نقلب في إتجاه واحد بشويش خالص
المهم ...الدقيق نحطه على 3 إو 4 مرات....نرش رشة دقيق و نقلب بشويش
من تحت لفوق و بعدين نحط تاني لحد ما المقدار يخلص












نيجي للنقطة المهمة جداً جداً
الصينية اللي هنخبز فيها - مقاس كبير ( 30 )
نحط فيها ورقه زبده و ندهنها زبده خفيفه



و نقطع ورق زبده شريطين يكون ارتفاعهم اكبر من الصينية و ندهن جوانب الصينية بالزبده ونحط الورق الزبده من الداخل
زي الصورة علشان الكيكة ترتفع و تاخد راحتها و ما تلزقش في الجوانب



نحط الخليط بالراحه و نخبط الصينية خبطه خفيفة علشان الهواء اللي فيها يطلع





ندخّل الصينية في الفرن في الوسط و نخللي الحرارة متوسطة لمده 10 دقائق و بعدين نوطي خااااااالص
علشان تستوي براحتها و ما نفتحش عليها لمده نص ساعه والا هتهبط منك ...بعد 45 دقيقه
ممكن نفتح باب الفرن مش للأخر ...يعني نفتحه حتة صغيره نشوف منها بس وش الكيكة
علشان لو فتحنا باب الفرن على الآخر الهواء البارد بيهبط الكيكة
وكمان نقفل الباب بشويييييييش خالص لنفس السبب
لحد ما نلاقي حروفها احمرت ((مش نسيبها تتحرق )) نحط سكين حاد فيها أو خلة إسنان خشب
لو طلعت نظيفه يبقى استوت خلاص...لو طلع فيها شوية عجين يبقى نسيبها تكمل
دي صورتها بعد ما استوت و نحطها على شبكة علشان تبرد من تحت كمان
و زي ما انتم شايفين ماشاء الله عاليه جداً جداً












بعد ما الكيكه طلعت نسيبها تبرد خاااااااااالص
ونلفها في كيس بلاستيك كويس و تدخل الثلاجه لتاني يوم
ده بيخليها اسهل في التقطيع و تكون متماسكه
نبدأ تجهيز التزيين بعد ما نتاكد إن الكيكة طلعت حلوة
مش نجهز الكريمة و الشوكولاته و تطلع الكيكة من الفرن مبططه
ههههههههههههههههههههههههههههههههههههه
نبدأ و نكمل تزيين الكيكه اللي عملناها..
انا جربت بودرة الكريم شانتيه و الكريمة اللباني
لقيت اللباني اسهل و لها طعم احلى كثيير
انا باستعمل اللي بتيجي في علب كرتون زي الصوره
مش نوع محدد ..اللي في الصورة دي نباتيه

لو هتعملي حشو ابيض نحط الكريمة في الفريزر يبرد كويس
علشان لما نخفقه بسرعه يتماسك ...
ونحط رشه فانيليا و ملعقه سكر بودرة
وأول ما تلاقيه تقيل توقفي الخفق لأنه هيتحول زبده
لو هنعمل حشو شوكولاته هنستعمل مقدار متساوي من الكريمة و من شوكولاته مبشورة
نحط الكريمة على النار مع التقليب المستمر و اول ما تغلي نطفي عليها و نحط الشوكولاته



ونقلبه لحد ما تذوب الشوكولاته ونغطيها بكيس فوق الخليط مباشرة علشان ما تعملش قشره







ونسيبها تبرد في الثلاجه.....لو عايزة تغطي التورته من فوق بشوكولاته سائله
شيلي نص الخليط زي ما هو للتغطية من فوق
الباقي نضربه بالمضرب لحد ما يتماسك زي الكريم شانتيه وده اللي بنحشي بيه
ونغطي بيه الجوانب بيبقى طعمه حكايه لانه شوكولاته مش كاكاو




نبدأ الشغل المهم ....نفرش مفرش على الترابيزه لأننا مش متخصصين فبنبهدل الدنيا
وكل الغرفه تبقى كريمة و شوكولاته ....نحط اي حاجه مقلوبه علشان نسهل الشغل على نفسنا
نحط القاعده اللي هنخللي الكيكة عليها و ندهنها بشوية كريمة علشان الكيكة تلزق و ما تتحركش



وطبعاً وش الكيكة هو اللي بنخليه تحت و نخلي قاعده الكيكة فوق علشان بتكون متساوية

نستعمل سكينه مشرشرة علشان نقسم الكيكة طبقات مع الضغط عليها من فوق علشان تتمكني منها







بعد كده نعمل قطع طولي (( خط واحد )) بارتفاع الكيكة علشان اكيد مش هنظبط التقطيع
وبكده لما نرجع كل طبقة نرجعها زي ما كانت ....مفهومة النقطة دي؟؟؟







نسمي و نحط اول طبقه و نرشها بشوية سفن أب (( 7-up )) علشان تفضل هشه و طريه وقت طويل
خللي بالك ما نرشش كثير يعني يادوب شويه على الحروف الناشفه و نقط رايح جاي على الطبقه
يعني التورتايه دي كلها خدت كوب واحد سفن أب.... لو زودتي هتلاقيها عجينه و ما تنفعش
نحط بقى الحشو و نرش شوكولاته و لو بتحبي فاكهه ومكسرات زبيب ...اللي يعجبك
ونغطي بالقطعه التانية بعد ما ندهنا من تحت بطبقة كريمة خفيفه علشان تلزق بسهوله مع الحشو
و ما ننساش نحط القطع اللي عملناه بالسكين فوق بعض و نضغط على الطبقة التانية و نساويها كويس
ونكرر الخطوات دي لحد ما نخلص الطبقات كلها

دي صور للطبقات وانا باعملها





الكريمة طبعاً بنخليها في الثلاجه علشان ما تسيحش مننا
نطلعها و نغطي بيها الكيكة كلها و الجوانب طبقة خفيفه
مش ضروري تكون مظبوطه لأننا لسه هنحط عليها طبقة
تانيه تكون مظبوطه ومتساوية و نبدأ نزوق الجوانب أي حاجه



انا ولادي ما بيحبوش إلا الشوكولاته يعني ولا جوز هند و لا مكسرات
.انا بشرت شوكولاته و أضفت لها الزينة الملونه
علشان المنظر بس...و استعملت كيس حلواني لعمل اللي فوق



وحطيت شوية الشوكولاته السائله اللي شلناها على جنب في الأول



و الزينه الخارجيه انتي و شطارتك المهم الخطوات تمشي عليها كويس
وبجد انا مش عاملاها مقتنه قوي و لا حاجه بس الطعم بيبقى حكاية
أحلى من الجاهزة مليون مرة....جربوها مش هتندموا