تورته الميلفي
المكونات :
عبوة ميل فاي فيها 3 طبقات جاهزة بحوالي 13 جنيه
ربع كيلو باستري كريم نلاقيه عند العطار او محلات لوازم الحلويات بحوالي 7 جنيه
وبس يعني تورتة ب20 جنيه
الطريقة:
اول حاجة هنجهز الباستري كريم :كل كوب باستري عليه كوب ونص لبن او مية ونقلبه بمضرب سلك او بالمعلقة وهنلاقيه تقل معانا بسرعة
تاني حاجة نجيب الطبقات بتاعة الميل فاي ونساويها بالسكينة من الحروف لان الحروف بتاعتها بتكون اعلي من الوسط بس اوعي ترمي اللي هيطلع ولا تاكليه وانتي واقفة هنعوزه بعد شوية
زي الصورة كدة هنشيل الحروف بالسكينة عشان تتساوي
هنجيب الطبقة الاولي ونحط عليها شوية باستري كريم ونفرده بالمعلقة ونبل المعلقة بلة ونفرد لسهولة الفرد
ونحط الطبقة التانية ونكرر نفس الكلام
ونحط الطبقة التالتة والاخيرة بس نخليها بالمقلوب يعني الجهة السفلية هي اللي فوق لانها بتكون متساوية
نجيب شوية باستري ونغطي بيه الجوانب بمعلقة عادية داير ما يدور التورتة
نجيب بواقي الميل فاي المكسر اللي شيلناه من الحروف في الاول (فاكرينه؟)ونلزقه بايدنا علي الجوانب
بعد المرحلة دي عندك اختيارات:ترشي شوية سكر بودرة وخلاص وتكون كدة جاهزة
او تحطي شوية مربي ع الوش وتكون جاهزة برضه
لو عايزة تعملي فيها اي حركة ممكن شوية باستري تعملي بيهم وردات حوالين التورتة حتي لو بكيس عادي مفتوح فتحة صغيرة
انا كان عندي حبة كريم شانتيه فايضين استخدمتهم وعملت وردات صغيرة حوالين التورتة
جبت معلقتين مربي وسيحتهم ع النار شوية عشان ميكونش فيها كلكعة
صبيت المربي في النص
وفردتها علي وش التورتة
وممكن تكون كدة جاهزة او نعمل فيها الخطوط اللي بتكون موجودة علي الميل فاي الجاهز
نجيب اي كيس ونحط فيه شوية كريم وممكن برضه باستري
ونعمل فتحة صغيرة في الكيس ونرسم بيه دواير علي المربي
وهنا بعد ما خلصت الدواير كلها
واجيب عود خشب (الاخضر اللي في الصورة)وابتدي اقف بيه علي الدايرة الصغيرةاللي في الداخل واسحب بخفة للخارج(السهم اليمين)
واسيب مسافة صغيرة واقف علي الدايرة الكبيرة الخارجية واسحب بخفة للداخل (السهم الشمال)
ودة هيكون شكلها في الاخر
0 التعليقات:
إرسال تعليق