تورته الفواكه بطريقه سهله جدا

تورته الفواكه بطريقه سهله جدا

المقادير
كوبين دقيق منخولين مع معلقتين كبار بكينج بودر وربع معلقة صغيرة بكينج صودا ( كربوناتو )
كوب سكر - ربع كوب زيت
3 بيضات كبيرة -عصير ليمونة كبيرة
كوب زبادي يعني 3 علب زبادي جهينة
وزن العلبة 80 جراااام
ربع معلقة صغيرة ملح - فانيلا

الطريقة

نسمي الله ونخفق البيض والسكر والفانيلا والملح
بالمضرب الكهربائي او خلاط العصير لحد ماينفش البيض
لمدة 5 دقايق
وبعدها نحط الزيت ونخفق ثانتين بس عشان يتقلب
وبعدها نفرغ التلات علب الزبادي في الكوباية
ونبدأ نحط المكونات الجافة بالتبادل مع الزبادي
على تلات مرات مع الليمون طبعا
مرة دقيق مع زبادي ونخفق عشان يتقلب بسس
ونكرر العملية دي 3 مرات ان شاء الله
لحد ماااا كل كمية الدقيق والزبادي تخلص
وهيكون خليط الكيك كريمي اوووي وجمييييل
ونصب الكيك في صينية 26 مدهونة كويس
وندخلها فرن حرارة هادية 160 الى 170
ومانفتحش عليها الا بعد 30 دقيقة
وبتاخد 45 دقيقة ان شاء الله
ونقلبها تبرد لمدة ساعتين او نعملها قبلها بيوم

ونعمل الحشو والتغليف
اللي هو الكريم شانتيه مع الفاكهة
في بولة نخفق 15 معلقة كريم شانتيه سايب يعني 3 مغلفات دريم ويب نخفقهم مع كوب وتلات ارباع مية متلجة او حليب
و4 ملاعق كبيرة سكر بودرة
نجيب 3 مغلفات كريمة دريم ونفضيهم في بولة
ونخفق الكريم شانتيه مع كوباية وتلات اربااااع المية المتلجة او الحليب لغاية اما تنفش زي كده
بتاخد يجي 7 دقايق ان شاء الله
ودلوقتي باقي نجمع التورتة الجميييلة ان شاء الله
نجيب علبتين كمبوت او نوع واحد
ونقسم كيكتنا الحلوووة 3 ديسكات
وكل ديسك نحط كريمة كمية محترمة لانها اساس الطعم تورتة الفواكه وقطع صغنونة اوووي من الاناناس
والخوخ يعني مش هنهدر علبة كمبوت الفواكه
ومش هنستخدم بسس الا اناناستين وخوخاااية ونوزعهم قطع صغيرة بين الديسكات
ونغلف الكيك بطبقة بسيطة من الكريمة زي كده
ونغلف حروف وجوانب التورتة بمكسرات بندق او جوز هند شرايح ( ضفر ) حسب ذوقنا
ونبدأ في رص الاناناس بطريقة مايلة زي كده
نقطع كل اناناسية نصين ونرصها وفوق كل واحدة كريزة
ونقطع خوختين كبااار شرايح ونحطها في النص على شكل وردة جمييييلة وفي النص كريزة
وندهن الفواكه اخر حاجة بعسل نحل او مربى مشمش
عشان تدي اللمعان للفواااكه
وبس بالهنا والشفا