ملف لتجهيزات الاكل في رمضان .

لقيت ملف قمه في الجمال للتحضيرات الاكل قبل رمضان عشان توفري وقتك للعباده فقولت انقلهولكم الكل يستفيد

وبمناسبة الشهر الكريم وطبعا كل سنه وانتوا بألف خير وصحه ويجعل كل عبادتنا فميزان حسناتنا يارب
حبيت اعمل لكم ملف تجميعى لتجهيزى لاكل رمضان من مطبخى


ده ملف تجميعى اغلب الصور من مطبخى واغلب الحاجات لسه مجهزتهاش فأستعنت بيها من جوجل عشان تقدروا تستفيدوا
وتلحقوا تجهزوا حاجتكم

هنبدا سوا ان شاء الله وانتوا بنفسكم هتشوفوا المجهود لو عجبكم قيموه وادعولى بالذريه الصالحه
لو لا يبقا كفايه تشريفكم للموضوع......

هنبدأ بأذن الرحمن :

الطماطم :
طبعا مفيش بيت بيستغنا عنها واكتر استخدمنا فالاكل وبالتالى هنجهزها كالاتى
اول حاجه هتنقى الطماطم الثمره الكويسه

هتغسليها كويس جداااا وتنشفى المايه منها بفوطة المطبخ وتحطيها فكيس كويس وتقفليه وعالفريزر ودى ميزه لانك هطلعيها اول ما هتفك هتلاقيها اتقشرت لوحدها

الطماطم المتسبكه للطبيخ:

انا بجيب حله وابشر فيها بصله متوسطه واحط عصير الطماطم وفلفل اسمر وقالب ماجى
وذرة بهارات ومعلقة صلصه جاهزه
طيب ليه ؟؟
لانها فيها مواد حافظه بالتالى هتحفظهالك وكمان بتديها لون احمر جمييييييل فالاكل
وبسيبها تبرد خالص واحطها فاكياس حفظ الاكل وعالفريزر

الثوم:

هتجيبى كميه محترمه منه وتقشريها وتفرميه فالكبه مه شوية ملح صغيره
وشوية زيت وتحفظيه فبرطمان كويس وتقفليه كويس جدااا
او
تعمليه فأكياس صغيره على قد الطبخه

الفاصوليا الخضرا:


بجيب حله وفيها مايه مغليه ولما تغلى بسقط الفاصوليا الخضرا
تاخد غلوتين وبس ولما اطلعها اسقطها فى مايه متلجــــــــــــــه وعصرة ليمونه
لحفظ اللون الاخضر بتاعها ولما تبرد بفرزها

نفس الطريقه دى للباميه والبسله

الحمص:


نسلقه كويس ومعاه شوية كمون ونسيبه يبرد وعالفريزر

الكفته المشويه:
نجيب اللحمه المفرومه وونبشر عليها بصله كبيره وملح وفلفل اسمر وبهارات
ونص كيس تتبيلة الكفته من عند العطار وبرغل ناعم جاف لحد ما تلم معانا
ونشكلها صوابع كفته ونرصها فأطباق الفويل وعالفريزر ودول عملتهم

عملت 3 اطباق لانى بحبها وفرزتهم فالفريزر


ودى شكلها لما بطلعيها وتعمليها كانها طازه وجاهزه بالظبـــــــــــــط كنت عملاها جنب المكرونه



الفراخ المشويه:

نتبلها بملح وفلفل اسمر وبابريكا وبهارات وبصل مبشور كتير وشرائح فلفل
وطماطم مبشوره وشوية زعتر وروز مارى وعالاكياس وعالفريزر
وده شكلها بعد ما بعملها



الفراخ البانيه :

نتبلها بملح وفلفل اسمر وبهارات وبصل مبشور وبابريكا وهيل مطحون
وشوية خل وعصرة ليمونه ونظبطها
فى الدقيق +معلقة بيكنج بودر
والبيض
وفالبقسماط
ونشيله فالفريزر وبعدين نطلعه نعمله وقت اللزوم وده شكلها


البفتيك:
نتبله فى خل وبهارات وبصل مبشور وفلفل اسمر وذرة كمون
ونجهزه زى البانيه ويبقا عالقلى

وده شكله لما هتعمليه ومتنسيش البيكنج بودر فالدقيق بيخليه تحففففففه



دجاج بالطماطم والثوم:

بجد الطريقه دى تحفـــــــــــــــــــه امى الله يخليها ال كانت علمتهالى ومش بستغنا عنها فعزوماتى
بتجيبى قطع الدجاج سواء بانيه تخين او قطع بالعضم مقطعه مكعبات
وتفصصى ثوم شرائح وتشوحيه وترمى عليه الدجاج وعليه شوية بهارات وفلفل اسمر و2 مكعب ماجى
وتقلبى كويس اوووووى
وتحطى عليه 2 طماطم مكعبات وشوية ماء وتغطيها وتسبيها تستوى براحتها
ولما تبرد
فعلبه وعالفريزر بطلعيها يادوب تتسخن وبسسسسسسسسسسس بتبقا طازه وجميله جدااااا



السمك:

تجيبى قطع سمك كبيره او بلطى وتتبليه ب ملح وكمون ولمون وكرفس مفروم وثوم كتيييييييير
وده شكله

تحطيه فالفريزر ووقت ما تطلعيه تقلبيه فالدقيق وتقليه او تعمليه صينيه او غيره برااااااااااحتك


كفتــــــــة الارز:
تجيبى المفرمه بتاعة اللحمه وتحطى فيها
نص كيلو لحمه مفرومه +حزمة بقدونس+ 5 فصوص توم+
1 كوب رز مطحون +بصله كبيره +ملح + فلفل اسمر+
وتشكليها كده

وعالفريزر
ولما تطلعيها يادوب تتحمر فالزيت وتعملى الصلصله بالثومه وتتسبك
وتسقطيها فيه

الكبيبه الشامى:
نحط فالكبه اللحمه والبرغل وملح وذرة قرفه وبهارات ونفرمهم كووووويس
ونبدأ نشكلها ونحشيها لحمه معصجه


السمبوسك:
سواء جبنه ولا لحمه انتى قسميها فاكياس عالقلى وبس
كيس باللحمه المفرومه او فى طبق فويل اوبالجبنه وعالفريزر


اللحمه المعصجه :
جهزى اللحمه المفرومه وشوحى بصله كبيره مبشوره
وحطي عليها اللحمه المفرومه وملح وفلفل اسمر وبهارات وذرة قرفه
وطمطمايه مبشوره وتسويها ولما تبرد تحطيها فكيس وعالفريزر



العدس:
هاتى حله وحطى فيها مايه وربع كيلو عدس اصفر و4 جزرات قطع
وبصله متقشره ومتقطعه 4 و5 فصوص ثوم وطمطمايه كبيره
وسبيه يتسلق كويس واضربيه فالخلاط وسبيه يبرد وفكيس وعالفريزر
فرمضان الكريم عالتحمير الشعريه والطشه وبسسسسسسس


الاسبرنج رول:

بعمله واجهزه بالطريقه دى وافرزه فالفريزر




الليمون :
سواء للتبيلات او للعصاير او غيرها
تعصر الليمون وتحطيه فقوالب التلج وتعمليه بالشكل ده وتحطيهم فاكياس او تخليهم فنفس القوالب


المانجا:

كلنا بنحبها
هاتيها وقشريها وقطعيها شرائح تخينه ووفكيس وعالفريزر



الفراوله :

يا اما تفرزيها صحيحه بعد تنضيفها وعالفريزر فكيس
او تعمليها مربى :
تنضفي كيلو الفراوله وتحطى عليها نص كيلو سكر وتسبيه لتانى يوم تجيب مايتها
وتانى يوم فحله عالنار وتقلبى واحده واحده لحد ما تستوى عالنار عاليه وتغلى هطلع رغاوى
تشليها وترميها ولما تغلى تعصرى عليها لمونه
تبرد وفرزيها فبرطمانات





العجوه لحشوات رمضان:

بجيب التمر وافصصه وافرمها يا بأيدى او بالكبه مع الزبده
لانها بتحفظها جدااااا وفالكيس وعالفريزر
بستخدمها فى المعجنات او فطاير فمرضان او القطايف او غيرها


الشيره:

كيلو سكر وعليه 2 كوب مايه وتحطيها عالنار ولما يغلوا سوا ويبدا يعمل الشيره
تعصرى الليمونه وعبيه فبرطمان وفالتلاجه للحلويات
انا عملت برطمان كبير و2 برطمان صغيره عشان الحلويات لو كميه قليله زى القطايف او الجلاش


شوربة الدجاج :
دى طبعا للسان العصفور او الاكلات المختلفه وبنستخدمها كتير
ده كيس كنت حطاه فالفريزر




اعملى خلطات المحشى بتاعك المفضله وعالفريزر

جهزى كفتة البطاطس وعالفريزر

جهزى القطايف المحشيه وغلفيها كويس فطبق فويل وعالفريزر

وهكذا