كحك العيد بالخطوات والصور والتفاصيييل

النهاردة حبيباتي موضوعنا عن كحك العيييييد
ويارب تقضوا احلى عيييد وكل ايامكم افراح ورضا من الله
واحلى حاجة في الكحك انه بيبقى ليه فرحة وهو بيتعمل
وبيعبر عن العيد وجمااله بفضل الله








بسم الله نبدأ المقادير والطريقة بالصور
7 كوب دقيق ونصف يعني كيلو دقيق موزون على الميزان ومعاه نصف كوب دقيق -كوبين ونصف سمن
4 ملاعق كبيرة قشطة
4 ملاعق كبيرة زبادي يعني علبة زبادي العلبة 80 جرام
او4 معالق حليب سايل لو مش حابة زبادى نحط بداله حليب
معلقتين كباااار سمسم - 3 ملاعق كبيرة جوز هند ناعم
معلقة كبيرة خميرة بيرة او فورية مذوبة مع معلقة كبيرة سكر ومعلقتين كبار مية
ربع معلقة صغيرة ملح
1/2 معلقة صغيرة ريحة كحك او قرفة
او نقطتين ريحة موز سايلة من عند العطار

بسم الله الطريقة

اول شيء نسمي الله وندوب الخميرة اول حاجة



دي الخميرة مع السكر وندوبها مع المية وندخلها الفرن مطفي عشان تتفاعل



في حلة كبيرة نحط الدقيق وعليه الملح وفي النص نعمل حفرة ونحط فيها السمسم




نعاير السمنة في الحلة كوبين ونص سمنة زي كده





ونحط السمنة على نااار متوسطة عشان نقدحها كويس
وطبعا قدح السمنة هو السر في الكحك الجمييييل لو السمنة مقدوحة كويس
الكحك هيفضل محافظ على شكله في الفرن
ولو مش مقدوحة كويس الكحك هينزل كل السمنة اللي فيه في الصينية
وتبقى حواليه بتعوم ههههههه بعيد الشر طبعا ان شاء الله
المهم نرجع للسمنة على النار هتسيح في البداية
ولو حطينا فيها كام واحدة سمسم هيفضل ابيض زي ماهو مش هيتحمر
وهينزل تحت في قاع الحلة
لان السمنة لسة ماقدحتش زي الصورة




وبعد 10 دقايق والسمنة بتقدح على النار وتغلي
لما نحط فيها كام حبة سمسم هيتلون في نفس الثاانية ويتحمر



وعلامة تانية نعرف بيها ان السمنة قدحت اننا لما نحط سمسم يرتفع بسرعة اووي على وش السمنة
و يتحمر وبيطرقع سبحان الله علامة ان السمنة قدحت واي سمسم نحطه فيها
بيتحمر بنفس الثانية ومش بياخد دقيقة حتى
ودي علامة قدح السمنة بفضل الله





دلوقتي نمسك حلة السمنة برفق ونسمي الله ونصب مقدار السمنة على حلة الدقيق
واحنا بعيييد عن البخار الحااااار اوووي يارب يعافيكم حبيباتي
ونسيب السمنة كده في الوسط لمدة دقيقة عشان تسّوي السمسم اللي في النص





ونبدأ نقلب بالمعلقة الستنالس عشان تتوزع السمنة في كل الدقيق
وهيا لسة بتغلي سبحانك يارب من شدة حرارتها




ونقلب كل الدقيق اللي مستخبي تحت وعلى الجوانب عشان كله يتشرب بالسمنة المقدوحة



ونبس الدقيق بالسمنة المقدوحة بظهر المعلقة نضغط الدقيق بالسمنة
واحنا بنقلب عشان يتشرب الدقيق كل السمنة ان شاء الله




وده شكل العجينة بعد مااا اتبست وتشربت كل السمنة بفضل الله ولونها بقى بيج هادي
دلوقتي لاااااازم نسيب عجينة الكحك تبرد تمااااما
قبل اضافة الخميرة لانها بتبقى سخنة اووووي
ولو ضيفنا عليها الخميرة والعجينة سخنة الخميرة مش هتتفاعل وهتموت
بعيييد الشر ان شاء الله
ونسيب العجينة تبرد تحت المروحة لمدة نص ساعة مثلا
وبعدها نضيف الخميرة المذوبة في المية والسكر ان شاء الله




وبعد مابردت العجينة كويس اووي تحت المروحة
نصب الخميرة عالعجينة اللي ماشاء الله تبارك الله تضاعف حجمها





ونحط الزبادي وجوز الهند وريحة الكحك ونعجن العجينة بايدينا عشان تختلط كل المكونات ولو مش حابين نحط زبادي نستبدله بحليب سايل وهيبقى رااائع برده
بس الزبادي ميزته انه بيدي الكحك ريحة جميييلة اوووي وبيضيع دسامة السمنة




وآخر حاجة القشطة بجمالها وبياضها الراائع ونعجن عشان تتشربها العجينة
وهيا سر الطعم الرهييب في الكحك اللي بتمنع ان الكحك يكون
كأننا بناكل سمنة القشطة بقى بتديله طعم جميييل اوووي وبتضيع دسامة الكحك ان شاء الله



وده شكل عجينة الكحك طرية وبتلمع وسهل في النقش جداااا ان شاء الله
ودلوقتي نشتغل في تشكيل الكحك على طوووول بدون ماننتظر انه يخمر



ونروح عالترابيزة ونفرش المفرش ونجيب العدة والمناقيش ونسمي الله
ونبدأ رحلة تشكيل الكحك ببهجته وجمااااله وروايح العيييد الجمييييلة
وبنطلع قطعة عجينة قدامنا وجنبها ملبن وباقي العجينة بنخليه في الحلة متغطي
وكل ماتخلص العجينة نجيب حتة كمااان لحد ماتخلص العجينة ان شاء الله



بس قبل مااكمل دي الكوباية اللي عايرت بيها الدقيق
والسمنة باننا نوصل الدقيق لحافة الكوب ونمسح الدقيق الزاايد بسكينة عشان يتساوى السطح



ومعايرها نفس معيار الاكواب المعيارية بالضبط
ان شاء الله وطبعا كيلو الدقيق بنشتريه موزون جاهز
او لو مش موزون نعاير 7 كوب دقيق من الكوب الي بالصورة
والسمنة برده كوبين ونص سمنة بنفس الكوب ان شاء الله
واشكر الغالية مراميرو لاني استعرت صورة المج
من موضوعاتها الرااائعة جزاها الله الجنة


ودلوقتي نرجع للكحك بفضل الله



ونحشي الكحك بالملبن او راحة الحلقوم زي كده
نعمل دايرة وونفرغها بصوابعنا وجواها قطعة ملبن طرية ولذييييذة ونقفل عليها كويس

وطبعا لو حابين نعجن الملبن مع معلقة سمنة وجوز هند وسمسم نعجنه قبل مانبدأ نحشي الكحك بس عندنا في البيت بنحب الملبن يكون طري بدون اي اضافااااااات عليه
وهو الملبن والله بيكون راااائع سواء اضفنا عليه جوز هند وسمسم وسمنة او مش اضفنا وكله حسب ذوقنا حبيباتي



وبعدين نبططها مش اووي زي كده




ونساوي الجوانب بالقطاعة المشرشرة زي كده او مش شرط نقطعها بالقطاعة نساويها بس
بصوابعنا ان شاء الله






واحلى حاجة في الكحك بجد نقشه وان كلنا بنتنافس مين نقشها احلى نقش هههههههههه
وطبعا مافيش زي مناقيش زمااان والله رااائعة ولما بتدخليها في العجين عشان تنقشي بتدي شكل
وااضح ومتماسك وجمييييل اوووي
وطبعا المناقيش دي أثرية بقالها يجي 30 سنة ماشاء الله
من ايام جدتي الله يرحمها ويدخلها الجنة ان شاء الله
ومع ذلك لسة محافظة على شكلها ورااائعة زي كأنها جديدة




وده شكل نقشة تانية في الكحكاية





والعجينة طرية بفضل الله والنقش واضح فيها




وممكن عشان الاطفال نعمل اشكال بطة وننقشها برده




او شكل قلب وننقشه وبيبقى تجدييد وجمييييل بفضل الله




ودي نقشة الكروهات




ودي نقشة شكل المُعين وكل الكحك نرصه في الصواني على خيرة الله
ولو الكحك كتييير على الصواني نخبز اللي بالصواني ولما تتخبز نملى الصواني دفعة جديييدة
وهكذاااااا ويااااسلام على ريحة البيت والكحك بيتخبز فعلا روايح العيييد
ويارب كل ايامكم اعيااااد ان شاء الله حبيباتي

ونسيب الكحك يخمر لمدة نص ساعة في الصاجات بعد مانخلص تشكيله وحشوه كله ان شاء الله قبل ماندخله الفرن
وبعدها نسويه عادي




طريقة التسوية
الفرن نسخنه على حرارة 160 الى 170 عشر دقايق
ونولعه من تحت بسسسسسسس
والكحك بيتسوى على حرارة هادية بامر الله
لانه لو الحرارة عالية عليه هيتحرق من بره ومن جوه يفضل عجين
والطريقة اننا نولع النار تحت ونحط صنيتين تحت وصنيتين فووووق عالرف



ونقفل عليهم الفرن لمدة ربع ساعة عشان يستوي على خيرة الله
وكيلو الكحك بيعمل اربع صواني كبيرة زي اللي في الفرن ان شاء الله



ولما نفتح بعد ربع ساعة نلاقي الصينيتين اللي تحت في الفرن
بدأو يحمروا من الجوانب زي كده نبدل الصواني
يعني نطلع صواني الكحك الي بقى لونه دهبي
نطلعها الرف اللي في الوسط وننزل الصنيتين اللي كانوا فووق لتحت على ارضية الفرن
عشان يستووا وياخدوا لون دهبي من تحت
ولما كل صواني الكحك تاخد لون دهبي نولع الشواية عشان ياخدوا لون دهبي جمييييل
ونطلع الصواني على رخامة المطبخ
وطبعا مانشيلش الكحك وهو سخن ابداااااااا في الصواني
نستنى لما تهدى حرارته ربع ساعة ونبدأ نحطه في صينية كبيرة
وكيلو الكحك بفضل الله بيعمل 70 كحكاية جميييلة وطبعا لو بنحبه كحك صغنن وعسول
نقدر نصغره اكتر ويبقى ممكن عندنا 90 كحكاية ماشاء الله وبمكونات بيتي وكلها ريحة طيبة
وبسم الله نبدأ صور التقديم



دي كمية من الكحك ولسة كان فيه صينية كماان في الفرن مش رصيتها





وممكن نرصهم زي كده برج دائري











ودي نعومته من الجنب بفضل الله







ناعم وفي نفس الوقت نقدر نشيله بفضل الله