رموش الست بالتفصيل الممل والصور

النهاردة حبيباتي موضوعنا عن رموش الست
وفيه اختلاف عليها هيا شرقية ولا تركية
و بتجمع بين البسبوسة والغريبة
لانه فيها سميد وسمنة ودقيق وبيض
وسبحااانك يارب على طعمها المميز
اللي مايشبهش اي حاجة دوقناها قبل كده
فيها قرمشة بنعومة بس ماسكة نفسها بنفس الوقت
وحلوووة اوووي برمضان كضيافة
او بالعزومات كتغيير بدل الكيك مثلا
واقل كمية منها بتعمل 56 واحدة بفضل الله
وهيا شكلها جاي من اسمها اكتر
لانها مدببة تخينة من طرف
ومسحوبة رفيعة من الطرف التاني شبه علامة التعجب
فاااا لما بتترص جنب بعضها بتكون زي رموش الست الحلووة
ويارب يعجبكم ان شاء الله

وبسم الله نبدأ مقادير رموش الست
كوب دقيق منخووول مع نص معلقة صغيرة بكينج بودر
بيضة كبيرة - نص كوب سمنة طرية
ربع كوب جوز هند - ربع كوب سكر بودرة
ربع كوب سميد + معلقة كبيرة سميد كماااان
ربع معلقة صغيرة ملح - فانيلا
3 نقط من رووح جوز الهند اختيااااااري

الشربات متوسط القوام
مش خفيف ولا تقيييل
كوب ونص سكر - كوب مية
عصير ليمونة

بسم الله الطريقة السهلة اوووي
في 5 دقايق ان شاء الله




في بولة نحط السمنة الطرية والسكر البودرة
ونضربهم بالمضرب الكهربائي لمدة 3 دقايق كده
عشان تنفش السمنة وتبيض



وبعدين نحط البيضة والملح والفانيلا
ونخفق دقيقة عشان تندمج

وخلاااص كده خلصنا بفضل الله دلوقتي نحط الدقيق المنخول مع البيكنج بودر والسميد وجوز الهند
وروح جوز الهند لو حاابين




ونعجن بايدينا دقيقة كده وهتبقى عجينة حلوووة وطرية



ونبتدي نشكل رموش الست ناخد قطعة صغيرة من العجينة قد نص معلقة صغيرة ونكورها بين راحة ايدينا زي الصورة
وطبعا حبيباتي كل ماكانت صغيرة وحلووة بقت احلى لانها بتنفش بالفرن كويس



وبين ايدينا الاتنين نبرم الكورة ونخلي الكورة عصاية
واحنا بنبرم نخلي طرف العصاية الصغنونة دي رفيع من الطرف ومدبب وتخيين من الطرف التاني
زي علامة التعجب دي !!!!!!
او زي عصيان البولينج بس علامة التعجب هيا الصصح



وبالسكينة نعمل خط في نص رمش الست
اللي عملناه زي الصورة
ونكمل بنفس الطريقة في نص ساعة ان شاء الله
ونرص رموش الست في صينية مدهونة زيت



اول لو مش حابين نعمل رمش الست زي علامة التعجب
برده فيه شكل تاني اننا نكور نص معلقة صغيرة برده من العجينة وبعدين نبرمها بين راحة ايدينا
بس نخليها رفيعة من الجنبين يعني تخينة من النص بسس ورفيعة من اليمين ورفيعة من الشماال
يعني بيكون الشكل التاني ده اقرب لكفتة داوود باشا هههههه بس هو رمش برده طبعا



وبرده نشق الرمش بالسكينة من الوسط زي كده وشق االرمش من الوسط بيدي شكل جمااالي
وكماان لما بتنفش الرموش بالفرن بيكون شكلها سبحااان الله كأنه رمش فعلا ولو مش حابين ده ولا ده
ممكن نكورها كرات صغيرة ونضغط عليها بالشوكة
وبسس لو حابين نسرع على نفسنا




وده الفرق بين الشكلين في الصينية


ودي الصواني فيها رموش الست
ولما نخلص ندخل رموش الست
في فرن حرارة هادية 160 الى 170 على الرف الاوسط
لمدة 20 الى 25 دقيقة ان شاء الله
ورموش الست في الفرن نعمل الشربات



ونفتح عليها بعد 20 دقيقة ولما نلاقي بقت دهبي من تحت
نطفي من تحت ونحطها تحت الشواية تاخد لون دهبي
واحنا مراقبينها ان شاء الله



ولما نطلع كل الصواااني نستنى
على رموش الست 10 دقايق كده تبرد
وبعدها نفرد كل الرموووش في صينية كبيرة زي كده
طبقة واحدة زي الصورة مش فوووق بعضها
ونسيبها تبرد تماااااما لمدة نص ساعة على رخامة

ونعمل الشرباااات السخن عشان نسقي بيه
رموش الست الباااردة
وطبعا حبيباااتي فيه حلين لو حااابين
ممكن نحط الشربات سخن والرموش باردة
او الشرباااات باااااارد والرموش سخنة لسة طااالعة من الفرن
ولو هنحط الشربات بارد والرموش سخنة
يبقى لاااازم نعمل الشربات بالبداااية قبل مانعمل عجينة رموش الست ان شاء الله
وانا عملته الشربات سخن بيغلي والرموش باااردة تماما




في كسرولة نحط السكر والمية على نار هادية ونقلب بالمعلقة كويس اوووي
ولما يغلي الشربااات  نعصر الليمونة ونقلبها بالمعلقة ثانية بسس


ونهدي النااااار خااالص زي الصورة ونسيب الشربات يغلي على نار هادية لمدة 10 دقايق ان شاء الله
وبعدها نطفي عليه ونحط فانيلا لو حابين

ونصب الشربات السخن على رموش الست البااااااردة اللي بالصينية
ونسيبها في الشربات لمدة ربع ساعة تتشرب وبعدها نشيلها منه ونقدمها ان شاء الله
وعليها رشة فستق او اي مكسرات مطحونة
وبسم الله نبدأ صور التقديم



ومن كوب دقيق واحد بفضل الله
عملت 56 واحدة رموش ست