كيكة الجزر بابداعات شيف

 كيكة الجزر بابداعات شيف
المقادير

مقاديرها بسيطة وسهلة أوي ومتوفرة في كل بيت

1/2 1 (واحد ونص) كوب دقيق فاخر منخول

2 كوب جزر مبشور

1/2 كوب عين الجمل

1/2 1 (واحد ونص) كوب سكر

3/4 كوب زيت نباتي

3 بيضات حجم كبير ولو صغيرين يبقو 4

1معلقة صغيرة باكنج باودر

1معلقة صغيرة باكنج صودا

رشة ملح

1 ملعقة طعام قرفة مطحونة
ده شكل المقادير كلها



في الأول حنفصل الصفار عن البياض . وحنحط نص كمية السكر على البياض بالتدريج مع الاستمرار في الخفق .



وصار بياض البيض مخفوق وكريمي






نشيل بياض البيض باستخدام الاسابتولا ونحطه على في طبق على جنب ونحط في الوعاء الي خفقنا فيه البياض الصفار مع باقي كمية السكر ونخفق كويس






نضيف مقدار الزيت مرة واحدة ونخفق






بعد كدة نضيف الباكنج صودا والباكنج باودر والملح والقرفة .
ونضيف الدقيق على دفعتين مع الخفق



هنا بعد اضافة كل كمية الدقيق اتكونت عندي عجينة ناشفة شوية




حنضيف الجزر وعين الجمل على خليط الكيك ونقلب باستخدام الاسباتويلا وحيكون الخلط تقيل شوية.




حبدأ أضيف بياض البيض على تلات مرات مع التقليب باستخدام الاسباتويلا من تحت لفوق وبخفة.



هنا لما ضفت نص كمية بياض البيض . لاحظي ازاي على طول الخليط اتلون بلون الجزر الاورنج الجميل



هنا بعض اضافة كل كمية بياض البيض . بس بقى عندنا خليط كيك ناعم ازاي وجميل


وهنا شكل خليط كيكة الجزر من قريب



دلوقتي الموديل راجع لذوق حضرتك . ممكن تخبزي الكيكة في صينية او في اي فرمة تحبيها . انا حعملها في ورق الكب كيك الجميل .


طبعاً بما اني حخبزها في ورق الكب كيك يبقى لازم حعبي خليط الكيك في كيس حلواني من بتوع الاستخدام لمرة واحدة فقط ليه بقى . علشان سهل جدا في توزيع الخليط وسريع اوي اوي اوي والاهم حيديكي نفس كمية خليط الكيك في كل كب . مش بقتنع خالص بموضوع استخدام معلقة الأيسكريم بحسها برضو بتخليكي محتاسة وانا موتي وسمي الاقي حواليا خليط كيك منقطع في كل حتى او مكان مش رايق ونضيف بترفقز جداً ^_^



حنعب ورق الكب كيك بخليط الكيك . وما ننساش نملى فقط 3/4 الورقة


المقادير دي ادتني 22 كب كيكاية







في أحلى من كدة المكان رايق حواليكي ونظيف ومجرد ما أخلص توزيع خليط الكيك أروح رامية الكيس في الشارع قصدي في الزبالة.



نخبز الكب كيك في الفرن .
وهنا صور كيكة الجزر بعد الخبز ^_^






بصي على الجمال والنعومة







كيكة الجزر زي الرد فلفت نكهتها بتفرق أوي وبتظهر بشكل أروع بمراحل كتيرة لما تتقدم مع كريمة الجبنة . وهي كريمة بسيطة اوي وسريعة والأهم مكوناتها متوفرة في كل بيت .
مقادير كريمة الجبنة هيا
7 طقع جبنة كيري او 3/4 كوباية جبنة فلادلفيا
1 كوب سكر بودرة يفضل الجاهز وليس المطحون في البيت
3 معالق طعام لبن مكثف محلى
وطبعاً لون طعام لو حبيتي

وده شكل مقادير كريمة الجبنة


في الاول لازم نكون مطلعين الجبنة من الثلاجة قبلها بنص ساعة علشان تبقى طرية . حنفقها لوحدة كويس علشان نضمنها انها ناعمة وطرية ومافيش فيها حبيبات


حنضيف كل مقدار السكر البودرة ونخفق. سبب استخدام السكر البودرة الجاهز مش المطحون في البيت هو اني الجاهز ناعم جدا جدا ومافهوش ادنى كمية من حبوب السكر الي ممكن تقرمش في البقى ,وعموما كل انواع الكريما بتبقى دلوعة فمحتاجة خامات عالية الجودة جداً وأهما السكر البودرة الجاهز المخصص للحلويات.


بضيف رشة من الفانيليا علشان يديني نكهة جميلة وحلوة للكريما

بضيف اللبن المكثف المحلى بالتدريج مع الاستمرار في الخفق لغاية ما تتشكل عندي كريمة ناعمة وقابلة للتشكيل .

خدت نص الكمية حطيتها في كيس حلواني


والجزء الثاني ضفت عليه نقطة من اللون الأورنج المخصص للأكل .



وده شكله برتقالي جميل جدا ومطرقع


دول هما الكيس واحد ابيض ساعة وواحد مطرقع . الي حعمله هو اني عايزة ازين كيكة الجزر بكريما نصها اورنج ونصها التاني ابيض . وكتير فتوكات سألوني عن الطريقة ودي فرصة . ركزو معايا .


ححط في كيس حلواني تالت قمع التزين بالصورة دي



حقطع الكيسين بالصورة دي
وأدخلهم في الكيس النهائي الي حزين بيه بالشكل ده


وحبدأ أعصر الكريما بحيث يبقى نصها ابيض ونصها أورنج المطرقع

كدة بعد ما عصرنا الكيسين جو الكيس النهائي وده بقى شكله.



وعيشي بقى الدور وزوقي براحتك


كدة تمام كيكة الجزر عندنا بقت جاهزة ومتزوق مش ناقص غير نقدمها . وده شكلها في شيالة الكب كيك الجميلة بتاعتي . ده شكلها النهائي