كيكه الكريم كراميل اوقدره قادر

كيكه الكريم كراميل اوقدره قادر 

اولا الكيكة عباره عن 3 مراحل

لو اتبعتيها بالضبط هتطلع تحفه واسهل مما يكون

اولا/ المكونات

المرحله الاولى
الكراميل

3/4 كوب سكر بس من غير اى اضافات

المرحلة التانيه
الكريمه

4بيضات

و3\4 كوب سكر

ملعقة صغيره فانيليا سايله

4 كوب لبن


المرحلة التالته
الكيكه

كوب وربع دقيق ابيض

1\4 كوب كاكاو خام غامق غير محلى

3 بيضات

3\4 كوب سكر

كوب زيت

ملعقة فانيليا سايله صغيره

باكو بيكنج بودر

3\4 كوب لبن

لوحابه تعمليها من غير كاكاو

يبقى تحطى كوب ونص دقيق ابيض وتشيلى الكاكاو

ثانيا/ الطريقة


بالنسبه للمرحلة الاولى

ممكن تعملى الخطوه دى فى حله ناشفه

مفيش فيها ولانقطة مايه

وممكن تعمليها فى نفس الصينيه اللى هتخبزى فيها الكيكه

هتجيبى حلة وتحطى فيها السكر

وتدوبيه على نار هاديه عشان ميتحرقش وطعمه يمرر

لحد متلاقيه داب خالص

وتصبى علطول الكراميل فى صينية الخبز وتفرديها فى الصينيه

الخطوه دى محتاجه سرعه عشان السكر بينشف بسرعه وهتلاقى بيتكسر

عشان كده قولت ممكن تدوبى السكر احسن فى صينية الخبز

عبال ما يبرد نيجى بقا

للمرحلة التانيه

قبل ما نبدأ فيها نشغل فرن البوتجاز على 180

المهم يكون سخن قبل الخبز بحوالى 10 دقايق ربع ساعه

نكمل بقا الطريقه

حطى كل مكونات المرحله التانيه فى الخلاط

(على فكره اللى عندها عجانه ممكن تعمل فيها بدل الخلاط )

وبعدين عالكراميل فى الصينيه بس اهم حاجه يكون الكراميل برد

وطبعا لازم يكون فى صينيه اكبر عشان تحطى فيها صينية الخبز

لان الكيكه دى بتختلف انها بتتخبز فى حمام ساخن

يعنى صينيه جوه صينيه

نيجى بقا للمرحلة التالته

حطى جميع المكونات السائله فى الخلاط

والمكونات الجافه الدقيق والبيكنج باودر والكاكاو

انخليهم فى بوله واخلطيهم

وبعد خلط المكونات السايله حطيهم على المكونات الجافه واخلطيهم

وعالصينيه وصبيهم

طبعا مش هتحطى الماية دلوقتى غير بعد ما تحطيها فى الفرن

عشان اولا هتبقى تقيله جدا

كمان احنا بنحط مايه سخنه

يعنى من الغلايه علطول

علشان لاقدر الله مفيش مايه تقع عليكى

ومش هتعرفى تشيليها من تقلها

معلش معرفتش اصورها

يعنى افتحى الفرن هيكون سخن طبعا

شدى رف الشبكه وحطى الصينيه وصبى المايه

واقفلى الفرن وسيبيها تستوى لمدة 55 دقيقه بالضبط

اختبريها بالسكينه او الخله

وبعد ما تستوى اطفى الفرن وسيبها ترتاح نص ساعه فى الفرن

وبعدين طلعيها تبرد لمدة ساعه فى المطبخ

اوعى تحطيه فى التلاجه علطول

بعد ما تبرد تماما حطيها فى التلاجه 5 ساعات 

المهم الحمد لله قلبتها بكل سهوله

لان ممكن متتقلبش معاكى غير لما تعملى حمام سخن لمدة دقايق

بس الحمد لله معملتش الخطوه دى

واتقلبت زى ما انا عاوزاها