التورته الهشه طبقات ابيض وبني بالصور

التورته الهشه طبقات ابيض وبني بالصور


مقادير الكيكة الاسفنجية(لصينية مقاس 32سم ياقمرات)

-12بيضة(طبعا البيض يبقى مش ساقع ويكون في درجة حرارة الغرفة العادية يعني تشتريه وتسبيه برة التلاجة لغاية ماتبتدي الشغل بيه مهم جدا)
-2كوب سكر بودرة(السكر ياقمرات يبقى مطحون ناعم قوي ومنخول بالمنخل الحرير بتاع الدقيق علشان يبقى نااااااااااااااااعم جدا جدا)
-2ونص كوب دقيق(دقيق حلويات وتنخليه بالمنخل الحرير كويس)
-125جرام محسن تورتة(شكله زي الفازلين كده ولونه ابيض شفاااااااااف)وده بتجيبيه من عند العطار أو سوبر ماركت كبير
-نصف كوب كاكاو خام
-كيس بيكنج بودر
-2كيس فانيليا
طبعا انا هنا عايرت الدقيق والسكر والكاكاو بكوباية الشاي العادية مش كبيرة(مش المج)

خطوات عمل الكيكة الاسفنجية

أنا هاعمل بال12 بيضة 2كيكة اسفنجية كل واحدة ب6بيضات علشان هاعمل كيكة أبيض وكيكة بني بالكاكاو الخام

أ-الكيكة الاسفنجية البيضا
1-هاتي طبق كبير بلاستيك وحطي فيه ال6بيضات ومعاهم كيس الفانيليا ونص كمية المحسن

2-اضربيهم على اعلى سرعة بالمضرب الكهربي وده شكلهم في البداية

تفضلي تضربي كمان 5دقايق لحد مايبقى شكلهم كده

3-ضيفي 1كوب سكر بودرة عليهم وتضربي كمان ربع ساعة (على الاقل)على اعلى سرعة ياقمر(ماتزهقيش الخطوة دي مهمة جدا جدا علشان الكيكة تبقى اسفنجية وهشة وماتهبطش في الفرن )افضلي اضربي كويس حتى لو مش حاسة ان الخليط فيه تغيير وماتزهقيش(دي اهم خطوة لاااااااازم تلتزمي بيها )والصبر اهم حاجة والخطوة دي بيعتمد عليها مستقبل التورتة كلها
اناشدكم جميعا يبقى عندكم ضمير في الخطوة 3

(هنضيف على الخليط اللي عامل زي الكريم شانتيه ده ربع كوب ماء ونضرب تاني بالمضرب 5دقايق وماتخافوش يافتوكات الخليط هيفضل متماسك ومش هيهبط نهائي)

وده شكل الخليط النهائي بعد ماوجعتي قلبه من الضرب(بيبقى كثافته تقيلة قوي زي الكريم شانتيه)

4-هاتي بقى كوب ونص دقيق (نشيل منهم ملعقتين طعام دقيق ونحط ملعقتين طعام نشا)

وحطي عليهم ملعقة بيكنج بودر صغيرة وقلبيهم مع بعض كويس وبعدين حطيهم على الخليط السابق

5-هاتي ملعقة خشب وقلبي بيهم الخليط بالراحة قوي واصبري عليه لغاااااية مايمتزج حلو مع بعضه( اهم حاجة هنا الهدوء وبلاش حركات عنيفة)علشان الخليط مايطلعش منه الهوا واتاكدي كويس ان الدقيق امتزج مع الخليط زي كده

لاحظي ان الخليط ماهبطش لما حطيت الدقيق والسر هنا طبعا اولا علشان ضربت كويس البيض والسكر وعلشان لما حطيت الدقيق قلبت بهوء شديد وصبر
6-نزلي بقى الخليط في وسط صينية متبطنة بسمن ودقيق زي كده

افردي بقى الخليط بالراحة بضهر ملعقة عريضة من الوسط للاطراف اسيبكم مع الصور هية اللي هتوضح

وكمان افردي كده

7-دخليها الفرن في الرف الوسطاني على درجة حرارة هادية(طبعا تكوني مولعة الفرن قبليها على نار عالية مش اقل من تلت ساعة وبعدين تهدي الفرن تاني5دقايق وبعدين تدخلي الصينية ياقمر)
ولما الكيكة تستوي هتلاقيها سابت من جناب الصينية وتطلعيها على منخل سلك(بس رشي عليه شوية دقيق صغيرين علشان الكيكة وشها مايلزقش في سلك المنخل)

ب-الكيكة الاسفنجية البني

هتعملي نفس خطوات الكيكة الاسفنجية الابيض من الخطوة1لغاية3
لكن الخطوة4 هتحطي كوب دقيق واحد(بدل كوب ونص) (نشيل منهم ملعقتين طعام دقيق ونحط ملعقتين طعام نشا)

ومعاهم نص كوب الكاكاو الخام وملعقة البيكنج بودر وقلبيهم مع بعض كويس وبعدين حطيهم على الخليط وكملي بقى الخطوة رقم5و6و7 زي اللي فوق
وده شكل الكيكة الاسفنجية


هتحطي الكيكتين ياقمر بعد مايبردوا في التلاجة لمدة 12ساعة (مهم جدا)

مكونات تزويق التورتة
1-شراب سكري
2-كريم شانتيه(350جرام)
3-شيكولاته خام(250جرام)(نصها سايحة بس تقيلة والنص التاني مبشور)
4-وحدات كريز حمرا (12 واحدة)
ان شاء الله اول مشاركة بعد الموضوع هتكون طريقة عمل الكريم شانتيه والشراب السكري والشيكولاته الخام

طريقة التزويق ياقمرات
-هقطعتي كل كيكة بالعرض هيبقى عندك 4قطع كيكة 2ابيض و2بني
-هاتي صينية التقديم وحطي علها اول كيكة بني زي كده

-اسقيها بالشراب السكري كويس (انا بسقي بالبخاخة وشكلها هنزله في المشاركة اللي جاية برضه)لانها بتوزع الشراب السكري حلو قوي
-وبعد ماتسقيها بالشراب السكري سبيها كده 5دقايق تتشربه وبعدين افردي ربع كمية الكريم شانتيه اللي عندك زي كده

-حطي بقى الكيكة الاسفنجية البيضا عليهم زي كده

شايفين يابنات الكيكة المسام اللي فيها هشة ازاي
-برضه رشي شوية شراب سكري كويسين كده على الكيكة زي كده

شايفين البخاخة موزعة ازاي الشراب السكري بالتساوي
-حطي بقى الكريم شانيه زي الطبقة اللي فاتت ياقمر

-وبعدين حطي الكيكة البني فوقيها واسقيها برضه شراب سكري (وسبيه 5دقايق يتشرب)وحطي الكريم شانتيه
وبعدين حطي أخر طبقة كيكة اللي هية البيضا وظبطي الجنب بالكريم شانتيه علشان يبقى متساوي زي كده


-رشي بقى الشيكولاته المبشورة على الجنب علشان تغطي الكريم شانتيه
-هاتي الشيكولاته السايحة حطيها بسرعة وهية دافية قبل ماتجمد على الوش ووزعيها بسرعة جدا لغاية ماتغطي بيها التورتاية من فوق وخللي بالك الشيكولاته ماتلمسش الكريم شانتيه وبعدين المنطقة الفاصلة بين الكريم شانتيه والشيكولاته اعملي فيها وردات كريم شانتيه زي كده

شايفين يابنات التورتة عالية ازاي

وزعي الكريز على وردات الكريم شانتيه وده بقى الشكل النهائي للتورتة ياقمرات
اتفضلوا






الشراب السكري
2كوب ماء
اكوب سكر عادي
حطيهم على النار يغلوا كويس 5دقايق وبعدين اطفي عليهم وحطي عليهم كيس فانيليا ولما يبردوا خالص حطي عليهم الكريز علشان وحدات الكريز تنفش وتبقى مدورة حلو
الكريم شانتيه
حطي ال350جرام كريم شانتيه على 600جرام لبن ساقع قوي زي كده

وتضربيهم ربع ساعة على الاقل بالمضرب الكهربي على اعلى سرعة زي كده




الشيكولاته السايحة(صوص الشيكولاته)
هتبشري الشيكولاته الخام بالمبشرة (250جرام)كلها نصها لتزويق جنب التورتة والنص التاني هتعملي بيه صوص الشيكولاته
حطي 3أو4 ملاعق لبن كبيرة في طاسة واغليهم وبعدين حطي عليهم نص كمية الشيكولاته المبشورة زي كده

وطي النار قوي وقلبي بسرعة لمدة ثواني اول مالشيكولاته تسيح اطفي بسرعة وده شكلها

بتحطيها بسرعة على التورتة قبل ماتجمد تاني علشان تعرفي تفرديها
وطبعا لما هتجمد مش هتبقى محجرة زي الشيكولاته الاصلية لان اللبن هيديها شوية ليونة وهتبقى عاملة زي الشيكولاته السايحة بتاعة كادبوري
وبالتالي لما تييجي تقطعي التورتة الطبقة اللي على الوش مش هتتكسر معاكي ياقمر
وادي شكل التورتة بعد ماقطعت منها

شايفين يابنات الشيكولاته سلسة جدا ماتكسرتش


ماتنسوش يابنات تغسلوا البخاخة علطووول اول ماتخلصوا علشان السكر ماينشفش عليها